Sámi Radio njeaidimin sámi álbmoga árvvolašvuoda

Saturday, 07 July 2007 18:21

Sámi Radio lea dál duogážassii fuotnumin, njeadimin ja soardimin sámi álbmoga ja sámi servodaga go ovttatláhkai oidnet áššiin aivve heajos beliid. Eat mii oaivvil ahte media ii galgga leat kritihkkalaš, muhto kritihkka lea oppalaš guorahallan ii ge dušše fal láitin. Sámi Radio berre áddet ahte das lea hui stuorra fápmu. Das lea seamma stuorra fápmu go olles min sámi oahppovuogádagas vaikkuhit, hábmet ja hukset servodatgova. Lea vel duođaleabbo dat ahte Sámi Radio lea áidna kánala min radio- ja TVmáilmmis, ja nu dat okto beassá muitaladdat duohtavuođaid ja báidnit min jurddašeami.

Áiddobáliid lea leamašan Chess-fitnodaga ášši guovddážis. Sámedikki presideanta Aili Keskitalo lei mielde ávvudeamin dán fitnodaga 5 jagi doaimma ja illudii go leai váldán atnui sámegiela. Muhto Sámi Rádio válljii čájehit áibbas eará gova ja jorahii dáhpáhusa vearridahkkun, danne go Sámi Radio mielas ii galgga sámedikki presideanta seaguhit iežas privahta fitnodagaide. Sámi Radio viggá jáhkkihit, ahte go vel dat ge mii lea illudanveara ja bajida servodaga iešdovddu, lea boastut vaikko dákkár oassálastin lea áibbas dábálaš stuorraservodagas. Orru leamen ahte Sámi Rádio oaivvilda ahte privahta fitnodagat eai gula sámi almmolašvuhtii. Ii go leat imaš ahte okta min deháleamos sámegielovddidan ásahusain ii ádde illudit go nubbi, priváhta fitnodat, ovddida sámegiela doaimma. Iešmearrideamis ferte leat ekonomalaš vuođđu, masa maiddái gullá ahte mis leat buorit oktavuođat fitnodagaide.

NUBBI EARÁ ávvodilálašvuohta maid Sámi Rádio viggá buváhallat lea hoteallahuksema Guovdageidnui. Stuorra sámebáiki, sámi ásahusat, sámi ealáhusat leat gillán 5 jagi hotealla haga, ja go viimmat beassat ávvudit dan go huksen álggahuvvo, de lea Sámi Rádio doppe kuohcisteamin. Muhto Sámi Radio ii baicce guorahala mo sámi suohkan, sámi ealáhusat, fidnodagat ja sámi almmolaš ásahusat leat gillán hotealla haga. Sámi Radioi lea stuorámuš áššiin ja oaivebakčasin go Sámedikki presideanta sáhttá šaddat komersiella gaccaid gaskii ja massit luohttámuša. Livččii vel áddehahtti jos livččejit valviin bahkkemin huksejeaddjit.
Muđui máilmmis álgoábmogiid oktavuođain illudit ja ávvudit go dáhpáhuvvá servodatlaš ovdaneapmi mii lea ávkin sidjiide. Sii leat dihtomielalaččat mearridan illudit go váldet giela ruovttoluotta, go huksejit stuorát autonomiija, go fidnejit iežaset ásahusaid jna. Diehtit ahte álgoálbmogiin ja sámiin leat juo losses historjját. Min mediat galget leat mielde doarjumin min álbmoga ja álbmotorgánaid viggámušaid ovddidit ja nannet sámeservodaga min iežamet árvvuid alde. Sámi Radio ii dárbbaš juohke beaivvi válljet muitalusaid mat njeidet iešluohttámuša ja jáhku sámi servodahkii. Mii dárbbašat juohke beaivvi oaidnit buriid dáhpáhusaid mat nanusmuhttet min álbmoga.

MEDIAT DIE_US GE galget guorahallat heajos beliid mat čuožžilit servodagas ja guorahallat omd. sponsejuvvon mátkkiid ja eará sponsejuvvon dilálašvuođaid. Mii háliidat dás jearrat man geahčastaga Sámi Radio vállje go muitala áššiid birra. Dál dat orru Sámi Radio állaneamin aivve ášši fuones beallái. Danne lea min mielas dál áigi ahte Sámi Rádio guorahallagoahtá iežas doaimma ja bonjasta kritihka iežas siskkáldas doibmii. Sámi Rádio berre jearrat man láhkái sii gokčet iežas ulbmila leat sámi álbmoga iešdovddu nannejeaddji ásahussan, iige kopiija muhtin dáža cuiggodeaddji journalistihkkii.

Sámi allaskuvlla bargiin
Rauna Kuokkanen, Asta Balto, Solveig Joks ja Liv Østmo
Last Updated on Saturday, 07 July 2007 18:22

Kommentera

E-postadressen publiceras inte. Obligatoriska fält är märkta *

Denna webbplats använder Akismet för att minska skräppost. Lär dig hur din kommentardata bearbetas.