Henrik Barruks tacktal

Thursday, 27 March 2008 19:37

Muv hållame

Månna mujtáb guh lib unnie, gåssie vuoras almatjh nålggsin sámien jah guktie sijjan báguoh diejven muv vájmuob.
Nuv leä jimmátjh guktie såmmásh báguoh mähtth vájmuob deävddiet.
Månna mujtáb guh lib nuorra jah tjidtjie subtstij suv áhkán bijrra.
Muv tjidtjie leä guvluos jahtáme gåssie rånttjuo leä áhkán gáptieb gájkkuolame:
”Banná rånttjuo áhkán gáptieb gájkkuolij.”
Nuv leä jimmátjh guktie daggáreh báguoh mähtth vájmuob deäjvvat.
Månna mujtáb guh lib sjaddame jah älggub sámiengielub báhkadit.
Bijjielen guektteluhkie jábieh leäh vassáme.
Dan tijjien lin alvvies vánieh gieh mähtten sámiengielub báhkadit.
Muvsnie lij jimmátjh niehkuo: váddiet jietjájde máb jijtja leäb vuöpttiestame, mijjan båndásvuohta.
Aktan ájgien såmies almatje muŋŋien budij jah jehtij: Mandehte leä dajna gielpuominne?
Majddie leä vuorránema?
Jus sadnán hålub: Månna leäb gellen ájgien gihtjame dab, majddie leäb vuorráname?
Valla guh skeneh, giella leä muv deäjvvame.
Bijkuos leä dán biejvien, nåvváj vuorahke máhttá áj árvuob ådtjuot.
Månna dan sagga ovvadib gåssie riŋggen muŋŋien jah subtsten ahte leäb dán jábien gudnieárvuob udtjame. Dájna árvuojne ij leäh barra muv jah muv barguob dåbddastahttáme, valla nåvváj åbba ubmejesámien gielub.
Vuostak sijdub muv fuelkieb gijttiet gieh leäh ållásine muv stårjjame, jah bednegh máb dállie ådtjuob sijdub biejjat ruopttijde muv fuölkkije gieh leäh áj májsáb mojssame.
Miŋŋieln sijdub muv tjidtjieb gijttiet gie leä suv vuorkáste vaddáme.
Månna sijdub áj gijttiet Olavi jah Raili Korhonen gieh leägan dan sagga muv viehkietame jah muŋŋien jáhkkáme.
Jah sijjije gieh leäh vaddáme muŋŋien lievnuos báguojde gåssie bargguo leä lussade sijdub gijttiet.

Jieŋa gijttuo!
Last Updated on Thursday, 27 March 2008 19:39

Spara

Kommentera

E-postadressen publiceras inte. Obligatoriska fält är märkta *